இந்தியா-இலங்கை ஒப்பந்தத்தை மறுஆய்வு செய்து கச்சத்தீவை மீட்க உடனடி நடவடிக்கை எடுக்க வேண்டும்: பிரதமருக்கு முதல்வர் மு.க.ஸ்டாலின் கடிதம்

சென்னை: தமிழ்நாடு மீனவர்களின் பாரம்பரிய மீன்பிடி உரிமைகளை நிரந்தரமாக பாதுகாக்க, இந்தியா-இலங்கை ஒப்பந்தத்தை விரைவில் மறு ஆய்வு செய்து கச்சத்தீவை மீட்பதற்கு உடனடியாக நடவடிக்கை எடுக்க வேண்டும் என்று பிரதமர் மோடிக்கு முதல்வர் மு.க.ஸ்டாலின் கடிதம் எழுதியுள்ளார். இதுகுறித்து பிரதமர் மோடிக்கு, தமிழ்நாடு முதல்வர் மு.க.ஸ்டாலின் நேற்று எழுதியுள்ள கடிதம் வருமாறு: 1974ம் ஆண்டு செய்து கொள்ளப்பட்ட இந்தியா-இலங்கை ஒப்பந்தம் (கச்சத்தீவு ஒப்பந்தம்) தான் நீடிக்கும் இப்பிரச்னைக்கு அடிப்படையாக உள்ளது.

கச்சத்தீவு ஒப்பந்தத்தை ஆரம்பத்தில் இருந்தே தமிழ்நாடு அரசு உறுதியுடன் எதிர்த்து வந்துள்ளதையும், 1974ம் ஆண்டு நாடாளுமன்றத்தில் கச்சத்தீவை இலங்கைக்கு விட்டுக் கொடுத்ததை தமிழக நாடாளுமன்ற உறுப்பினர்கள் அப்போது கடுமையாக எதிர்த்துள்ளதை சுட்டிக்காட்டுகிறேன். 28.6.1974 அன்று ஒன்றிய அரசு கச்சத்தீவு ஒப்பந்தத்தில் மாநில அரசின் இசைவின்றி கையெழுத்திட்ட பிறகு, அப்போதைய முதல்வர் கலைஞர் உடனடியாக மறுநாளே 29.6.1974 அன்று தலைமை செயலகத்தில் அனைத்துக்கட்சி கூட்டத்தை கூட்டி, அதை கண்டித்து தீர்மானம் நிறைவேற்றி, அன்றைய தினமே அப்போதைய இந்திய பிரதமருக்கு கடிதம் எழுதியுள்ளார்.

அதை தொடர்ந்து, கச்சத்தீவு பிரச்னையில் ஒன்றிய அரசின் முடிவை வன்மையாக எதிர்த்து தமிழ்நாடு சட்டமன்ற பேரவையில் 21.8.1974 அன்று தீர்மானம் நிறைவேற்றப்பட்டது. தமிழக மீனவர்களின் பாரம்பரிய மீன்பிடி உரிமையை பாதுகாக்க, கச்சத்தீவினை திரும்பப் பெற வேண்டும் என்ற நிலையான கோரிக்கையை வலியுறுத்தி 3.10.1991, 3.5.2013, 5.12.2014 ஆகிய நாட்களில் தமிழ்நாடு சட்டமன்ற பேரவை இதேபோன்ற தீர்மானங்கள் நிறைவேற்றியுள்ளது.

தான் முதலமைச்சராக பொறுப்பேற்ற பிறகு பிரதமருடன் 17.6.2021 அன்று நடந்த முதல் சந்திப்பின்போது, இப்பிரச்னையை உங்கள் கவனத்திற்கு கொண்டு வந்துள்ளேன். இலங்கை கடற்படையினரால் இந்திய மீனவர்கள் கைது செய்யப்படுவது மற்றும் தாக்கப்படுவது குறித்து 2021ம் ஆண்டு முதல் வெளியுறவுத்துறை அமைச்சருக்கும் பிரதமருக்கும் பலமுறை கடிதங்களை எழுதியுள்ளேன்.
இப்பிரச்னைக்கு நிரந்தர தீர்வு காண்பதற்கு ஒரே வழி கச்சத்தீவை திரும்பப் பெற வேண்டும் என்ற தொடர் கோரிக்கையை மீண்டும் வலியுறுத்துகிறேன்.

இந்தியா-இலங்கை ஒப்பந்தத்தை உடனடியாக மறு ஆய்வு செய்து, கச்சத்தீவை மீட்பதற்கான அனைத்து நடவடிக்கைகளையும் ஒன்றிய அரசு எடுக்க வேண்டும். அரசுமுறை பயணமாக இலங்கை செல்லும் இந்திய பிரதமர், இலங்கை அரசுடன் பேசி, அந்நாட்டு சிறையில் வாடும் நமது மீனவர்களையும், அவர்களது படகுகளையும் நல்லெண்ண அடிப்படையில் விடுதலை செய்து மீட்டுக் கொண்டுவர வேண்டுமென்பதை வலியுறுத்தி நேற்று முன்தினம் தமிழ்நாடு சட்டமன்ற பேரவையில் தீர்மானம் ஒருமனதாக நிறைவேற்றப்பட்டுள்ளது. இவ்வாறு கூறப்பட்டுள்ளது.

The post இந்தியா-இலங்கை ஒப்பந்தத்தை மறுஆய்வு செய்து கச்சத்தீவை மீட்க உடனடி நடவடிக்கை எடுக்க வேண்டும்: பிரதமருக்கு முதல்வர் மு.க.ஸ்டாலின் கடிதம் appeared first on Dinakaran.