2024ம் ஆண்டின் சிறந்த டெஸ்ட் கிரிக்கெட் வீரருக்கான விருதை வென்ற இந்திய பந்துவீச்சாளர்

துபாய்,

சர்வதேச கிரிக்கெட் கவுன்சில் (ஐ.சி.சி.) ஆண்டுதோறும் சிறந்த டெஸ்ட், ஒருநாள், டி20 அணிகள் மற்றும் சிறந்த வீரர், வீராங்கனைகளை தேர்வு செய்து கவுரவித்து வருகிறது. ஆண்டு முழுவதும் வீரர், வீராங்கனைகள் சிறப்பாக செயல்பட்ட விதத்தை கணக்கில் கொண்டு இந்த கவுரவத்துக்கு தேர்ந்தெடுக்கப்படுவார்கள்.

அந்த வகையில், 2024-ம் ஆண்டிற்கான சிறந்த டெஸ்ட் கிரிக்கெட் வீரர் விருதுக்கு 4 வீரர்களின் பெயர்களை ஐ.சி.சி. பரிந்துரைத்திருந்தது.

அதன்படி அந்த பட்டியலில் இங்கிலாந்து பேட்ஸ்மேன்களான ஜோ ரூட் மற்றும் ஹாரி புரூக், இலங்கை வீரரான கமிந்து மென்டிஸ் மற்றும் இந்தியாவின் நட்சத்திர வேகப்பந்து வீச்சாளர் ஜஸ்பிரித் பும்ரா ஆகியோர் இடம் பெற்றிருந்தனர்.

இவர்களில் 2024-ம் ஆண்டின் சிறந்த டெஸ்ட் வீரராக இந்தியாவின் ஜஸ்பிரித் பும்ரா தேர்வு செய்யப்பட்டுள்ளார். இவர் கடந்த ஆண்டு மட்டும் 13 போட்டிகளில் விளையாடி 71 விக்கெட்டுகள் வீழ்த்தியுள்ளார்.