15 ஆண்டாக குடிநீருக்காக அலையும் திருவாரூர் - புழுதிக்குடி கிராம மக்கள்!

திருவாரூர்: திருவாரூர் மாவட்டம் கோட்டூர் அருகே புழுதிக்குடி கிராம மக்கள் குடிநீருக்காக 15 ஆண்டுகளாக அலைந்து திரிந்து வருகின்றனர். திருவாரூர் மாவட்டம் கோட்டூர் ஒன்றியம் புழுதிக்குடி ஊராட்சியில் மேல புழுதிக்குடி, அகரவயல், ஆண்டிக்கோட்டகம் உள்ளிட்ட கிராமங்கள் உள்ளன. இப்பகுதியில் பெரும்பாலும் விவசாய தொழிலாளர்களும், சிறு, குறு விவசாயிகளும் உள்ளனர்.

இந்த கிராமத்துக்கு கடந்த 15 ஆண்டு காலமாக குடிநீர் பிரச்சினை இருந்து வருகிறது. சுமார் 2 கிலோ மீட்டர் தொலைவில் உள்ள பூசலாங்குடி கிராமத்தில் ஒரு ஆழ்துளை குழாயில் மட்டும் நல்ல தண்ணீர் வருவதால், அதையே புழுதிக்குடி ஊராட்சிக்கு உட்பட்ட மக்கள் பயன்படுத்த வேண்டிய சூழல் உள்ளது. இதற்காக தினம்தோறும் காலையில் அங்கு சைக்கிளில் அல்லது நடந்து சென்று குடிநீர் கொண்டு வர வேண்டிய நிலை இருந்து வருவதாகவும் அப்பகுதி மக்கள் கவலை தெரிவிக்கின்றனர்.