மோகன்லால் இயக்கியுள்ள 'பரோஸ்' திரைப்படத்தின் ரிலீஸ் தேதி அறிவிப்பு

திருவனந்தபுரம்,

பிரபல மலையாள நடிகர் மோகன்லால். இவர் தற்போது ஒரு படத்தை இயக்குகிறார். இது இவர் இயக்கும் முதல் படமாகும். இப்படத்திற்கு 'பரோஸ்' என்று பெயரிடப்பட்டுள்ளது. இந்த படத்தில் குரு சோமசுந்தரம், மீரா ஜாஸ்மின், ஸ்பானிஷ் நடிகை பாஸ் வேகா, ரபேல் அமர்கோ உட்பட பலர் நடித்துள்ளனர். இந்த படத்தை அந்தோணி பெரும்பாவூர் தயாரிக்கிறார்.

குழந்தைகளைக் கவரும் விதமாக உருவாகும் இந்த படத்துக்கு சந்தோஷ் சிவன் ஒளிப்பதிவு செய்துள்ளார். லிடியன் நாதஸ்வரம் இசை அமைக்கிறார். 3டி-யில் உருவாகும் இந்த படம், பான் இந்தியா முறையில் வெளியாக இருக்கிறது.

வாஸ்கோட காமாவின் மதிப்புமிக்க பொக்கிஷங்களைப் பாதுகாத்த, பாதுகாவலரான பரோஸ் என்பவரின் வாழ்க்கை கதைதான் இந்த படம் என்கிறார்கள். இந்நிலையில், இப்படம் ஓணம் பண்டிகையை முன்னிட்டு செப்டம்பர் 12-ம் தேதி திரையரங்குகளில் வெளியாகும் என அறிவிக்கப்பட்டிருந்தது. ஆனால் காப்புரிமை பிரச்சினை இருப்பதன் காரணமாக படத்தினை வெளியிட தடை இருந்தது. இதனால் ரிலீஸ் தேதி தள்ளி போனது.

இந்தநிலையில், 'பரோஸ்' படம் வருகிற வரும் டிசம்பர் 25-ம் தேதி திரையரங்குகளில் வெளியாகும் என அறிவிக்கப்பட்டுள்ளது.

கடந்த 1980-ம் ஆண்டு டிசம்பர் 25-ம் தேதி பாசில் இயக்கத்தில் மோகன்லால் நடிப்பில் வெளியான மலையாள திரைப்படம் 'மஞ்சிள் விரிஞ்ச பூக்கள்'. மோகன்லால் நடிகராக அறிமுகமான இந்தப் படம் வெளியாகி 44 ஆண்டுகள் கழித்து, டிசம்பர் 25-ம் தேதியான அதே நாளில் அவர் இயக்குநராக அறிமுகமாகும் 'பரோஸ்' திரைப்படம் திரையரங்குகளில் வெளியாகிறது. இந்தப் படத்தின் ரிலீஸ் தேதியை இயக்குநர் பாசிலைக் கொண்டு அறிவிக்க வைத்துள்ளார் மோகன்லால்.

இது தொடர்பாக இயக்குநர் பாசில் பேசும் வீடியோவை தனது சமூக வலைதள பக்கத்தில் மோகன்லால் வெளியிட்டுள்ளார். பாசில் பேசுகையில், "மோகன்லால் படத்தின் வெளியீட்டு தேதியை அறிவித்ததும் நான் ஆச்சரியமடைந்தேன். இந்த தற்செயல் நிகழ்வில் தெய்வத்தின் தலையீடு இருப்பதாக உணர்ந்தேன். அவர் நடிகராக அறிமுகமான அதே நாள் தான் இது என நான் மோகன்லாலிடம் சொன்னபோது அவரும் ஆச்சரியமடைந்தார். தயாரிப்பாளர் ஆண்டனி பெரும்பாவூர் உட்பட படக்குழுவினர் அனைவரும் ஆச்சரியமடைந்தனர்" என தெரிவித்துள்ளார்.

வாஸ்கோடகாமாவின் மதிப்புமிக்க பொக்கிஷங்களைப் பாதுகாத்த, பாதுகாவலரான பரோஸ் என்பவரின் வாழ்க்கை கதைதான் இந்தப் படம் என்கிறார்கள். இந்தப் படத்தின் ஒரு பகுதி பின்னணி இசை பணிகள் அமெரிக்காவின் லாஸ் ஏஞ்சல்ஸ் நகரில் நடந்துள்ளன. படத்தின் பணிகள் கடந்த 2019-ம் ஆண்டு தொடங்கின.