புதுச்சேரியில் பொதுப்பணித் துறை தேர்வு முடிவுகள் ரத்து செய்யப்பட்டு புதிய முடிவுகள் வெளியீடு

புதுச்சேரி: தொழில்நுட்பக் கோளாறு காரணமாக புதுச்சேரியில் வெளியான பொதுப்பணித்துறை தேர்வு முடிவுகள் ரத்து செய்யப்பட்டு, புதிய முடிவுகள் தற்போது வெளியிடப்பட்டுள்ளன. அதன்படி இளநிலைப்பொறியாளர் பதவிக்கு 99 பேரும், ஓவர்சீர் பதவிக்கு 69 பேரும் என 168 பேர் தேர்வாகியுள்ளனர்.

புதுச்சேரி பொதுப்பணித் துறையில் இளநிலை பொறியாளர் - 99, ஓவர்சீர் - 69 என மொத்தம் 168 பணியிடங்களை நிரப்ப எழுத்து தேர்வு கடந்த 27ம் தேதி நடந்தது. தேர்வு இரண்டு தாள்களை கொண்டிருந்தது. தாள் 1-ல் 98 மதிப்பெண்கள், தாள் 2-ல் 96 மதிப்பெண்கள் என மொத்தமாக 194 மதிப்பெண்களுக்கு மதிப்பீடு செய்யப்பட்டது. அந்த வகையில், குறைந்த பட்ச மதிப்பெண்ணாக பொதுப்பிரிவினர் 30 சதவீதம் என்ற வகையில் 194-க்கு 58.20 மதிப்பெண்ணும், எம்பிசி, ஓபிசி, இடபிள்யூஎஸ், இபிசி, பிசிஎம்-25 சதவீதம் என்ற வகையில் 48.50 மதிப்பெண்ணும், எஸ்சி, எஸ்டி, மாற்றுத்திறனாளிகள் 20 சதவீதம் என்ற வகையில் 38.80 மதிப்பெண்ணும் பெற்றிருக்க வேண்டும். இதன் அடிப்படையில் மதிப்பீடு செய்யப்பட்டு தேர்வு முடிவு இணையதளத்தில் வெளியிடப்பட்டது.