ஈரோடு கிழக்கு தொகுதியில் 3 நாட்கள் மட்டுமே வேட்புமனு தாக்கல்: தேர்தல் அலுவலர் தகவல்

ஈரோடு: ஈரோடு கிழக்கு தொகுதியில் பொங்கல் பண்டிகை மற்றும் விடுமுறை நாட்கள் தவிர்த்து, ஜனவரி 10, 13 மற்றும் 17 ஆகிய 3 நாட்கள் மட்டுமே வேட்பு மனுத்தாக்கல் செய்ய இயலும், என மாவட்ட தேர்தல் அலுவலர் ராஜ கோபால் சுன்கரா தெரிவித்தார். ஈரோடு கிழக்குத் தொகுதிக்கு பிப்ரவரி 5-ம் தேதி இடைத்தேர்தல் அறிவிக்கப்பட்ட நிலையில், தேர்தல் நடத்தை விதிமுறைகள் உடனடியாக அமலுக்கு வந்துள்ளன. இதன்படி, ஈரோடு மாநகராட்சி மேயர் மற்றும் துணை மேயர் அறைகள் பூட்டி ‘சீல்’ வைக்கப்பட்டன.

தொகுதியில் உள்ள அரசு அலுவலகங்களில் முதல்வர், அரசியல் கட்சித் தலைவர்களின் புகைப்படங்கள் அகற்றப்பட்டன. ஈரோடு கிழக்கில் பன்னீர் செல்வம் பூங்காவில் உள்ள எம்ஜிஆர், ஜெயலலிதா, கருணாநிதி, அண்ணா உள்ளிட்ட தலைவர்களின் சிலைகளை மூடவும் நடவடிக்கை மேற்கொள்ளப்பட்டுள்ளது. இடைத்தேர்தலை ஒட்டி கட்சிக்கொடிகம்பங்கள், அரசியல் கட்சிகளின் பேனர்களை அகற்றும் பணிகளும் தொடங்கியுள்ளன.