வாக்காளர்களுக்கு நன்றி தெரிவிக்க பிரியங்கா, ராகுல் காந்தி இன்று வயநாடு வருகை: 2 நாட்கள் சுற்றுப்பயணம்

திருவனந்தபுரம்: தேர்தலில் வெற்றிபெற வைத்த வாக்காளர்களுக்கு நன்றி சொல்வதற்காக பிரியங்கா காந்தியும், ராகுல் காந்தியும் இன்று வயநாடு வருகின்றனர். இன்றும், நாளையும் நடைபெறும் பல்வேறு நிகழ்ச்சிகளில் இருவரும் கலந்து கொள்கின்றனர். கேரள மாநிலம் வயநாடு மக்களவைத் தொகுதி இடைத்தேர்தலில் போட்டியிட்ட காங்கிரஸ் கூட்டணி வேட்பாளர் பிரியங்கா காந்தி 4.10 லட்சம் வாக்குகள் வித்தியாசத்தில், இடதுசாரி கூட்டணி வேட்பாளர் சத்யன் மொகேரியை தோற்கடித்தார். தொடர்ந்து கடந்த 28ம் தேதி நாடாளுமன்றத்தில் இவர் எம்பியாக பொறுப்பேற்றார்.

இந்நிலையில் வாக்காளர்களுக்கு நன்றி சொல்வதற்காக பிரியங்கா காந்தி இன்று வயநாடு தொகுதிக்கு வருகிறார். அவருடன் எதிர்க்கட்சித் தலைவர் ராகுல் காந்தியும் வருகிறார். இன்று காலை 11 மணிக்கு டெல்லியில் இருந்து விமானம் மூலம் கோழிக்கோடு வரும் இருவரும் அங்கிருந்து காரில் மலப்புரம் மாவட்டம் முக்கத்திற்கு செல்கின்றனர். நண்பகல் 12 மணியளவில் இங்கு நடைபெறும் கூட்டத்தில் இருவரும் கலந்து கொண்டு பேசுகின்றனர்.

இதன்பின் கருளாயி, வண்டூர் மற்றும் எடவண்ணா ஆகிய இடங்களில் நடைபெறும் நன்றி அறிவிப்பு கூட்டங்களில் பிரியங்காவும், ராகுலும் கலந்து கொள்கின்றனர். நாளை வயநாடு மாவட்டம் கல்பெட்டா, சுல்தான்பத்தேரி மற்றும் மானந்தவாடி ஆகிய இடங்களில் நடைபெறும் கூட்டங்களிலும் கலந்து கொள்கின்றனர். இதையடுத்து நாளை மாலை மீண்டும் இருவரும் கோழிக்கோட்டில் இருந்து டெல்லி திரும்புகின்றனர்.

The post வாக்காளர்களுக்கு நன்றி தெரிவிக்க பிரியங்கா, ராகுல் காந்தி இன்று வயநாடு வருகை: 2 நாட்கள் சுற்றுப்பயணம் appeared first on Dinakaran.