தமிழக வெற்றிக் கழக மாநாடு: விரைவில் தேதி அறிவிப்பு..?

தமிழக வெற்றிக்கழகம் என்ற கட்சியை தொடங்கிய நடிகர் விஜய், தற்போது அக்கட்சியின் முதல் மாநாடு நடத்துவதற்கு ஆயத்தமாகி வருகிறார். விழுப்புரம் மாவட்டம் விக்கிரவாண்டி அடுத்த வி.சாலையில் மாநாடு நடத்துவதற்காக 85 ஏக்கர் நிலத்தை அக்கட்சியினர் தேர்வு செய்துள்ளனர். இங்கு வருகிற 23-ந்தேதி மாநாடு நடைபெற இருப்பதாக தகவல் வெளியாகி இருந்தது.

இந்த நிலையில் மாநாடு நடத்த அனுமதி வழங்க வேண்டும் என்றும் அதற்கு பாதுகாப்பு அளித்திட வேண்டும் என்று கூறி, கடந்த மாதம் 28-ந்தேதி, விழுப்புரம் மாவட்ட போலீஸ் சூப்பிரண்டு அலுவலகம், மாவட்ட கலெக்டர் அலுவலகங்களில் அக்கட்சி சார்பில் மனு கொடுக்கப்பட்டது. இதனிடையே மாநாடு நடத்த அனுமதி அளிப்பது தொடர்பாக 21 கேள்விகளை போலீசார் கேட்டு இருந்தனர். போலீசார் கேட்ட 21 கேள்விகளுக்கும் விஜய் தரப்பு பதிலளித்தது. இதனைத்தொடர்ந்து தமிழக வெற்றிக் கழகத்தின் மாநாட்டுக்கு நிபந்தனைகளுடன் போலீசார் அனுமதி வழங்கினர். தேசிய நெடுஞ்சாலையில் போக்குவரத்து பாதிப்பு ஏற்படாத வண்ணம் மாநாடு நடத்த வேண்டும் என்பது உள்ளிட்ட 33 நிபந்தனைகள் விதிக்கப்பட்டுள்ளதாக தகவல் வெளியாகி இருந்தது. மாநாட்டுக்கு அனுமதி வழங்கப்பட்ட நிலையில், மாநாடு நடைபெறும் தேதியை விஜய் விரைவில் அதிகாரபூர்வமாக அறிவிப்பார் என்று எதிர்பார்க்கப்பட்டது.

இந்நிலையில் விஜயின் தமிழக வெற்றிக் கழகத்தின் முதல் மாநாட்டிற்கான தேதி விரைவில் வெளியாகும் என்று தகவல் வெளியாகி உள்ளது. மாநாடு நடைபெற உள்ள இடத்திற்கான நில உரிமையாளர்களிடம் ஒப்பந்தத்தை நீட்டித்து கையெழுத்து வாங்கும் பணி தீவிரமாக நடந்து வருகிறது. கையெழுத்து பணிகள் முடிவடைந்த பின் மாநாட்டிற்கான தேதி அறிவிக்கப்பட வாய்ப்புள்ளதாக தகவல் வெளியாகி உள்ளது. இதனிடையே தேதி குறிப்பிடாமல் மாநாட்டிற்கு சுவர் விளம்பரம் செய்வதில் த.வெ.க. தொண்டர்கள் ஆர்வம் காட்டி வருகின்றனர்.