கிருஷ்ணகிரி | புதிய திட்டப் பணிகளை கே.பி.முனுசாமி தொடங்கி வைக்க திமுகவினர் எதிர்ப்பு: அதிமுகவினர் சாலை மறியல்

கிருஷ்ணகிரி: சூளகிரி அருகே ராமன்தொட்டி பகுதியில் புதிய திட்டப் பணிகளை தொடங்கி வைக்கச் சென்ற அதிமுக துணை பொதுச் செயலாளரும், வேப்பனப்பள்ளி எம்எல்ஏ-வுமான கே.பி.முனுசாமிக்கு, திமுகவினர் எதிர்ப்பு தெரிவித்ததால், அதிமுக எம்எல்ஏ-க்கள் சாலை மறியல் போராட்டத்தில் ஈடுபட்டனர்.

கிருஷ்ணகிரி மாவட்டம் வேப்பனப்பள்ளி சட்டமன்ற தொகுதி சூளகிரி வட்டம் கும்பளம் ஊராட்சிக்கு உட்பட்ட ராமன்தொட்டி கேட் முதல் தொட்டோகவுனப்பள்ளி, சிகரலப்பள்ளி வழியாக சின்னார்தொட்டி கிராமத்தில் மாநில எல்லை வரை சுமார் 6.630 கி.மீ தூரத்திற்கு ரூ.5 கோடியே 36 லட்சத்து 55 ஆயிரம் மதிப்பில் புதிய சாலை அமைக்கப்படுகிறது. இதேபோல், சின்னார்தொட்டி ஊராட்சி கிராமங்களின் இடையில் குப்பம் ஏரி கால்வாய்க்கு ரூ.2 கோடியே 29 லட்சத்து 26 ஆயிரம் மதிப்பில் சிறு பாலம் அமைக்கப்படுகிறது.